மாதாக்கோயில் மணியோசை மசூதியில் ஒலிக்க வேண்டும்,
மாசிலா குரானோடு கீதையை இணைக்க வேண்டும்!

வஞ்சனையால் வளர்ந்த வன்முறை ஒழிய வேண்டும்,
வழிந்தோடும் செந்நதி அடியோடு வற்ற வேண்டும்!

மூடர்களின் நம்பிக்கைகளுக்கு முற்றுப்புள்ளி வைக்க வேண்டும்,
முறையில்லா விதிகளுக்கு கேள்விக்குறி இட வேண்டும்!

தடுமாறும் ஏழைப் பெண்களை மதிக்க வேண்டும்,
தட்சணை கேட்கும் துட்சனை மிதிக்க வேண்டும்!

வெள்ளை உடுத்தும் விதவைக்கு மறுவாழ்வு வேண்டும்,
தொல்லை படுத்தும் மடமைக்கு ஒரு முடிவு வேண்டும்!

புதியோர் உள்ளங்களுக்கு உரிய மாற்றம் வேண்டும்,
முதியோர் இல்லங்களுக்கு பெரிய பூட்டு வேண்டும்!

மதியினைக் கெடுக்கும் மதுவினை ஒழிக்க வேண்டும்,
மதியிழந்த மானுடர் மனம் செழிக்க வேண்டும்!

மகுடவெறி பிடித்த மிருகங்கள் மண்ணாக வேண்டும்,
மக்களுக்காகப் பாடுபடும் மனிதன் தலைவனாக வேண்டும்!

இவையாவும் இந்தியனின் நினைவில் கலக்க வேண்டும்,
நினைவில் கலந்த கனவு மெய்ப்பட வேண்டும்!